STANDARD o SPECIAL?

Banana type… Sabon… at Pamato…

Familiar ba sayo ang mga tawag na iyan? Mga tawag na nakilala sa mga nakalipas na panahon. Mga katawagan sa mga luma at unang seleponong(Cellphone) lumabas sa ating bansa.

Anu nga ba ang unang selepono mong gamit? Paano ito nakatulong sayo at anu ang gamit nito sa buhay mo?

Naaalala ko pa noon, “Banana type” na selepono ang unang gamit ng aming pamilya. Ito yung malaking seleponong ang tanging gamit lang ay pantawag at di pa uso noon ang pagpapadala ng mensahe. Tatlo ata ang ganoong namin sa bahay. Nokia 999 ata yun. Di ko na talaga matandaan. Matagal na kasi iyon. Balik nalang tayo sa kwento ko.

Pangalawang selepono ko ay ang Pamato. Ewan ko kung ako lang ang nagpangalan sa seleponong ito pero alam ko yun talaga ang usong tawag sa kanya sa panahong iyon. Sa tibay ba naman kasi niya na halos basag na ang tagiliran ng “battery” nito ay gumagana pa din. Sa itsura pa niya ay tila isang pamato sa larong tantsing. Ang tinutukoy ko ay ang NOKIA 5110. Ito pinakaunang seleponong pwede nang magpadala ng mensahe at pantawag pa. Ito din ang unang seleponong nalalagyan na ng “LOAD”. May antenna pa pala ang seleponong ito. Ewan ko ba bakit nilagyan nila ng ganun pero sabi nila pampalakas daw ng signal.

Pangatlo ang Sabon, NOKIA 3210 laban sa ALCATEL.  Ang dalawang selepono na iyan ang unang itsurang sabon na lumabas sa pamilihang bayan ng ating bansa. Ito marahil ang simula ng pinaliit at pinagandang itsura ng selepono sa bansa. Hindi ko nagamit ang seleponong ito kasi si ate ang binili ni Papa nito. Mas sumikat noon ang NOKIA at nawala sa ere ang ALCATEL sa di ko alam na dahilan. Pero katulad ng 5110 ay may nagustuhan ako sa 3210. Ang parehas na NOKIAng ito ay may tunog na kilala sa tawag na“STANDARD at SPECIAL”.  Ikaw anu ang gamit mo?  Alam mo ba ang tinutukoy ko?.

Ako kasi mas tinangkilik ko ang paggamit ng “SPECIAL” kahit na ingay na ingay sila Mama noon sa tunog niya. Tapos itotodo ko pa sa LEVEL 5 yung lakas niya yung tipong rinig buong baranggay ang tunog at nagmamayabang na may kilala akong selepono. Ganun ako tuwang tuwa sa mga dating selepono.

Sa ngayon madami na ang lumabas. May mga kamera na. May mga koneksyon sa WIFI at marami pang iba pero di pa din nitong kayang tumbasan ang saya at ala-ala ng mga sinaunang seleponong talagang tinangkilik ng bansa at ng masang Pilipino. Mga antigong selepong nagpakilala at nagpakinang sa NOKIA noon hanggang sa ngayon.

Kung tatanungin mo ako kung sakaling gagamitin ko pa ang mga ito sa ngayon kung meron pa sila sa mga tindahan, buong pagmamalaki kong sasabihin na OO. Sino ba naman ang hindi gagamit sa mga matitibay na seleponong unang naimbento ng NOKIA.

“Tinintintin tininin…. tinintintin tininin…”

O siya hanggang dito nalang magtext pa sa selepono ko. Basta lagi mong tatandaan. Luma man ang selepono mo o bago ang mahalaga nagagamit mo ito at napapakinabangan mo ng husto. At higit sa lahat dapat NOKIA ang gamit mo kasi mula noon hanggang ngayon hindi ka nila bibiguin sa tagline nilang ”CONNECTING PEOPLE”.

—————————————————————————————————

ang lahok na ito ay upang sumali at sumuporta sa Nokia Essay Writing Contest ng PEBA 2011.